Fáa donsku ognirnar á nýggjárinum

Tað dregur út at geva Føroyum ognirnar hjá donsku verjuni í Føroyum, nú Færøernes Kommando ikki er her longur.

Í ár eru annars játtaðar 1,1 millión krónur til at reka ognirnar, men landsstýrið hevur mælt til at taka 800.000 kr. av játtanini og brúka tær til annað.

Løgmansskrivstovan arbeiðir við málinum.

Danski verjumálaráðharrin góðkendi í september í ár, at føroyingar fáa ognirnar.

Men Fíggjareftirlitið skal góðkenna avgerðina.

Og í føroyska Fíggjarmálaráðnum vænta tey ikki, at føroyingar kunnu yvirtaka ognirnar fyrr enn um ársskiftið.

Virðið á ognunum hjá verjuni í Føroyum er mett at vera nakrar og tjúgu milliónir krónur, 23 milliónir, segði danska stjórnin í fjør.

Men føroyingar fáa ognirnar fyri einki.

Talan er um ognirnar, sum Færøernes Kommando átti í Mjørkadali, á Sornfelli og kommandørbústaðin yviri við Strond í Havn.

Fyri einum ári síðani var ætlanin, at landsstýrið skuldi fáa ognirnar 1.januar í ár.