Atlantsflog flýgur aftur til Stansted

Atlantsflog skifti annars floghavn í London frá Stanstead til Gatwick fyri nøkrum árum síðani. Men nú fer flogfelagið aftur at flúgva til Stansted.

Tað váttar Magni Arge, stjóri í Atlantsflogi.

Magni Arge sigur, at orsøkin til at flogfelagið nú aftur fer at flýgva til Standsted er, at tað er bíligari, og teinurin er styttri at flúgva. Og Atlantsflog fekk ikki tað burtur úr at skifta frá Stansted til Gatwich, sum felagið hevði væntað.

Tá Atlantsflog byrjaði at flúgva til Gatwich, var mett, at fyrimunirnir við at flúgva til Gatwich vóru at floghavnin liggur sunnan fyri London, hevur beinleiðis toksamband inn til London, og hevur fleiri handlar og tænastur. Men tað er ikki hent.

Liggur betur fyri

Umleið helvtin av ferðafólkunum, sum flúgva millum Vágar og London, eru bretar. Magni Arge heldur, at Stansted liggur betur fyri enn Gatwich í mun til at fáa enn fleiri bretar at flúgva til Føroyar. 

Stjórin á Standsted floghavn, Andrew Harrison, fegnast um, at Atlantsflog aftur fer at flýgva til flogvøllin norðan fyri London. Við tíðindaportalin EADT24 sigur hann, at hann væntar, at flogrutan verður væl umtókt, og at flogvøllurin í Stansted fer at gera sítt fyri at tryggja, at so verður.

Altantsflog fer at flýgva til London tvær ferðir um vikuna frá 6. juni til 25 august 2014.