Magnus Jákupsson DM-vinnari í 100 m. rygg

Magnus Jákupsson var fyrstur á mál, og er danmarkarmeistari í 100 metur ryggsvimjing.

17.11.2013 - 20:26

Tað bleiv ein sannførandi sigur til Magnus Jákupsson, tá ið hann og Andreas Schiellerup møttust til 'revanche' í 100 metra ryggsvimjing, eftir at teir báðir fríggjakvøldið vunnu gull og settu danskt met á hálva teininum.

Magnus tók beinanvegin leiðsluna við 24.93 sekundum eftir fyrstu 50 metrarnar í mun til Andreas á 25.20. Magnus helt seg framman fyri avbjóðaran, og vann við tíðini 51.75 sekund. Schiellerup svam 52.07.

Hetta er stórt persónligt met hjá Magnusi. Gamla metið hjá honum var 52.62. Nýggja metið hjá Magnusi er stutt frá danska metinum, sum er 51.54.

Svimjing.com skrivar, at tíðin hjá Magnusi Jákupsson er sambært SwimRankings hin triðbesta í Evropa hetta svimjiárið, og langt undir kravtíðini hjá dønum til EM í Herning, á 53.16.