Ikki loyvt hava summardekk í hálku

Frá 1. desember til 30. apríl verður ikki loyvt at koyra við summardekkum, um hálka er, uttan so at ketur eisini eru á hjólunum. Samstundis verður í hesum tíðarskeiði víðkað um undantakið at brúka vetrardekk ella píkadekk.

Tað stendur í einari nýggjari kunngerð frá Johan Dahl, landsstýrismanni í vinnumálum, sum eisini umsitur ferðslumál.

Sostatt kunnu bilførarar koyra við summardekkum vetrarmánaðirnar, men tá hálka er, verður ikki loyvt at nýta summardekk. Við hesum koma Føroyar upp í bólkin av norðurlondum, ið hava ásetta skyldu at nýta í minsta lagi vetrardekk í tíðarskeiðnum, tá hálka kemur fyri. Danmark hevur ikki hesa skyldu.

Verið til hoyringar

Kunngerðin hevur verið til hoyringar hjá Landsverki, Vinnuhúsinum, Kommunufelagnum, Kommunusamskipanini, Ferðslutrygd, Fútanum, Koyrilærarafelagnum og báðum tryggingarfeløgunum, og øll taka undir við broytingini, sigur Vinnumálaráðið.

Johan Dahl sigur, at endamálið er at økja ferðslutrygdina. Nýggja kunngerðin kemur í gildi 1. desember.