Politiið byggir í Hoyvík

Tórshavnar býráð samtykti í gjárkvøldi einmælt at geva politinum byggiloyvi til eina nýggja politistøð við Karlamagnusarbreyt í Hoyvík.

Talan er um eina fyribils politistøð, sum verður sett upp í modulum. Søkt var um ein bygning, ið skal standa í 5 ár.

Av tí at bygningurin ikki lýkur byggitreytirnar fyri økið, skuldi býráðið geva frávik frá ásetingunum fyri økið.

Nýggja politistøðin á Karlamagnusarbreyt verður í trimum hæddum har hvør hæddin verður 810 fermetrar. Húsið verður formað sum ein U-bygningur við móttøku út móti Karlamagnusarbreyt og einum bilagarði við útkoyring móti Myllutjørn.