Alt skal fram

Danska stjórnin fer at leggja fram uppskot fyri fólkatingið, um at alt sum læknar tjena, tá teir í frítíðini arbeiða fyri heilivágsfyritøkur, skal í framtíðini almannakunngerast.

Uppskotið verður lagt fram, tí í fleiri ár, hevur óvissa valdað um nógva samskiftið sum er ímillum læknar og heilivágsfyritøkur, og spurnartekin er sett við, hvussu eftirfarandi læknareru .

Tí skal tað í framíðini vera alment, hvussu nógv læknar, tannlæknar, apotekarar og onnur í heilsuverkinum tjenar, tá tey arbeiða fyri heilivágsfyritøkur.

Vilja hava gjøgnumskygni
- Tað er neyðugt at hava gjøgnumskygni, tí alsamt fleiri seta spurnartekin við habilitetin hjá læknum og øðrum, sigur danski heilsumálaráðharrin, Astrid Krag við DR.

Sum nú er, ber til at síggja, hvørjir læknar hava samstarv við heilivágsfyritøkur, men í framtíðini skal eisini bera til at síggja, hvussu stóra inntøku teir hava av samstarvinum.

Læknarnir taka undir við uppskotinum, tí tað er neyðugt við gjøgnumskygni, fyri at sleppa undan ivanum sum nú valdar, sigur formaðurin í Læknafelagnum, Mads Koch Hansen.

Ivasom undirtøka

Heilivágsfyritøkurnar taka eisini undir við uppskotinum so allur ivi kann beinast av vegnum. Men læknar sum nevna seg læknar uttan stuðul, taka ikki undir við uppskotinum.

Tað ber ikki til, at læknar sum arbeiða fyri heilivágsfyritøkur, undirvísa øðrum læknum, hvussu heilivágur skal gevast, sigur ein av læknunum, Thorsten Schumann.

Samstundis sum krøvini til læknarnar verða herd, skulu sjúklingafeløg eisini almannakunngera, hvørjum tey fáa stuðul frá.