Fokus á krabbamein og kost

Í kostverkætlanini á deildini, B6 á Landssjúkrahúsinum, er serligt fokus á krabbamein.

Samanumtikið er tað tann sjúklingabólkurin, ið hevur størstan tørv á einum betri matartilboði, meðan tey eru innløgd.

Krabbamein er eisini størsti sjúklingabólkurin í fasu 1 í Kostverkætlanini á B6.

Sjúklingar við føðslutroti

Krabbameinssjúklingar eru ofta hart raktir av føðslutroti, orsakað av sjúkuni sjálvari, hjáárin til viðgerðina, skeivum mati osfr.

Heilsugóður matur, ið fyribyrgir krabbamein, er als ikki tað besta at eta, tá matarlysturin er ringur orsakað av sjúku.

Sjúklingar, ið eta ov lítið og tapa seg nógv, tola ofta ikki tí hørðu viðgerðina, og tískil kann tað hava við sær, at t.d. kemoviðgerð má útsetast ella í summum førum heilt steðgast, tí sjúklingurin er ov veikur. Umleið triði hvør krabbameinssjúklingur, ið doyr, doyr orsakað av føðslutroti.

Nógvar kanningar hava víst, at kostráðgeving og orku- og proteinríkur matur og drykkir gera heilt stóran mun hjá krabbameinssjúklingum, soleiðis at lívsgóðskan og útlitini gerast betri (Ravasco et al. J Clin Oncol 2005).

Til ber at fylgja við kostætlanini á B6:  Kostverkætlanin á B6.