Grønlendskur umboðsmaður í Washington

Grønlendska landsstýrisforkvinnan, Aleqa Hammond, hevur tilnevnt Innuteq Holm Olsen at standa á odda fyri nýggju grønlendsku umboðsstovuni í Washington, sum letur upp næsta ár. Peningur er játtaður á grønlendsku fíggjarlógini næsta ár, og umboðsstovan fer at halda til á donsku sendistovuni í Washington, upplýsir Aleqa Hammond.

Innuteq Holm Olsen er settur í fimm ár, og hansara fremsta uppgáva verður at styrkja handils- og búskaparligu sambondini millum Grønland og USA. Grønlendska umboðsstovan í Washington skal eisini røkja sambandið við Kanada.

Innuteq Holm Olsen hevur starvast í grønlendska Sjálvstýrinum síðani 1996. Hann hevur eisini starvast í danska uttanríksiráðnum og á grønlendsku umboðsstovuni í Brússel.