Makrelur: ES og Noreg eiga at standa saman

ES og Noreg eiga at standa saman í makrelstríðnum.

Tí líkist tað ongum, at Maria Damanaki, fiskivinnukommisserur, av sínum eintingum, uttan at tosa við Noreg fyrst, bjóðar føroyingum størri part av makrelkvotuni.

Tað sigur Esben Sverdrup-Jensen, stjóri í felagnum hjá donskum uppsjóvarvirkjum, Danmarks Pelagiske Producentorganisation, við Fiskeritidende.

Hann sigur, at felagið hevur leingi ávarað móti tí, sum nú er hent. Tí tað setur samgonguna millum ES og Noreg í vanda.

Hava gjørt avtalu

Esben Sverdrup-Jensen minnir á, at ES og Norra gjørdu eina tíggja ára avtalu í 2009 um, hvussu ES og Noreg skulu býta fiskakvoturnar millum sín.

ES og Noreg eiga at standa saman í samráðingunum við Føroyar og Ísland um makrelin, sigur Esben Sverdrup-Jensen. Føroyar tóku annars ikki av tilboðnum um størri part av makrelkvotuni, sum Maria Damanaki hevði við sær til Føroya í síðstu viku.

Strandarlondini eru framvegis ikki samd um, hvussu stóra makrelkvotan, sum er næstan ein millión tons, skal býtast millum londini næsta ár.