Umboðsmaðurin verður eisini barnaumboð

Løgtingsins umboðsmaður verður nú eisini barna- og ungdómsumboð.

Tað hevur løgtingið einmælt samtykt.

Formansskapurin skeyt upp fyri tinginum at víðka heimildirnar hjá umboðsmanninum til eisini at fevna um privatar stovnar, sum hava ábyrgd av børnum. Sett verður beinleiðis í lógina, at umboðsmaðurin skal tryggja og hava eftirlit við, at ST-barnasáttmálin verður settur í gildi, og hava eftirlit við barnarættindum, sum eru ásett í føroyskari lóg, til tess at lúka skyldurnar í sáttmálanum.

Vitja privatar stovnar og fosturheim

Týdningarmesta broytingin er, at umboðsmaðurin fær heimild at vitja privatar stovnar og fosturheim, sum hava ábyrgd av børnum. Hetta er eitt nú galdandi fyri frískúlar, privatar bú- og umlættingarstovnar og fosturfamiljur, sambært barnaverndarlógini.

At víðka arbeiðsøkið hjá umboðsmanninum verður mett at kosta eina millión krónur næsta ár og 950.000 kr. í 2015 og næstu árini.