Fiskaren: Føroyar fáa 12,4 prosent av kvotuni

Føroyska makrelkvotan er nú komin upp í 12,4 prosent sambært norska blaðnum Fiskeribladet Fiskaren.

Blaðið sigur seg vita, at tað, sum lá á borðinum í gjárkvøldið, tá samráðingarnar millum strandarlondini vórðu tiknar uppaftur, vóru 49,4 prosent til ES, 22,5 prosent til Norra, 12,4 til Føroya, 11,9 til Íslands og 3,7 prosent til NEAFC at lata Russlandi og Grønlandi. 

99,9 prosent

Hesi tølini eru, samanløgd, 99,9 prosent. Men sambært øðrum keldum, millum annað føroyska samráðingarleiðaranum, skiltu 0,8 prosent partarnar. Talið var 100,8 prosent, tá partarnir hittust í London í gjárkvøldið. 0,8 prosent skulu finnast í heildini, so talið endar á 100.

Norska fiskivinnublaðið heldur seg tó hava so stóra vissu fyri sínum tølum, at blaðið hevur eina atkvøðugreiðslu á heimasíðuni, har spurt verður, um Norra eigur at góðtaka hetta býtið.

Í dag og í morgin

ES stendur fyri samráðingunum um makrelbýtið í 2014, og samráðingarleiðarin hjá ES, John Spencer, hevur sett dagin í dag og fríggjadagin av til samráðingarnar. Samstundis eru eisini samráðingar um svartkjaft og norðhavssild í London í hesum døgum.