Keypa framvegis partabrøv í Atlantsflogi

Ikki øll, sum eiga partabrøv í Atlantic Airways, hava tol at bíða eftir tjóðartøkuni. Ella hava tey ikki álit á henni. Tí hóast P/f Atlantsflog hevur boðað frá, at felagið fer at keypa øll partabrøvini í felagnum, sum landið ikki eigur, fyri kursin 210, verða partabrøv framvegis seld fyri lægri kurs enn tað.

í gjár vórðu 232 partabrøv í Atlantsflogi seld í keypsskálanum í Keypmannahavn, nógv tey flestu fyri kursin 202. 17 partabrøv vórðu seld fyri kursin 208.  Løgtingið samtykti 12.februar, at Atlantsflog skal keypa aftur triðingin av felagnum, sum varð einskildur í 2007.

Fyrireika afturkeyp

Fyrireikingarnar eru nú í gongd, og tær kunnu taka ein til tveir mánaðir afturat. Nevndin í Atlantsflogi ger eitt ítøkiligt uppskot um afturkeypsætlan og afturkeypstilboð, sum verður lagt fyri partaeigararnar til góðkenningar sambært galdandi reglum. Uppskotið verður lagt fyri aðalfundin hjá felagnum, har heimild verður givin nevndini at keypa aftur privata partapeningin.  Fortreytin fyri at keypa privatu partabrøvini er, at landsstýrið eftir keypið hevur í minsta lagi 90% av atkvøðurættinum í felagnum. 

Landsstýrið kann síðani tvinga partaeigarar, sum ikki góðkenna tilboðið um at selja síni partabrøv, til at selja tey.