Vilja hava javnstøðu í almennum partafeløgum

Yvirlitið hjá løgmanni við almennum nevndum og ráðum hevur nú elvt til eitt uppskot um lógarbroyting. Tjóðveldi og Javnaðarflokkurin vilja hava javnstøðulógina broytta, so hon eisini umfatar almenn partafeløg. 

Tá fólk verða vald í nevndina í almennum partafelag skulu eisini, sum javnstøðulógin sigur, "umleið eins nógvir limir av báðum kynum vera  umboðaðir."     

25 menn og 11 kvinnur

Stóru andstøðuflokkarnir vísa á, at í teimum seks partafeløgunum, sum landið eigur, eru 36 nevndarlimir, 25 menn og 11 kvinnur. Tá eru fólkini, sum starvsfólkini velja í nevndina, tald við.  Í øllum seks nevndum eru menn í meiriluta, og bara ein forkvinna er. 

Tjóðveldi og Javnaðarflokkurin undrast eisini á, at í P/f Atlantsflogi er einasta kvinnan í nevndini útlendsk og býr uttanlands.  Í teimum førum, tá landsstýrið ikki eigur allar nevndarlimirnar, skal landsstýrið velja síni fólk soleiðis at á leið líka nógvar  kvinnur sum menn eru í nevndini.