Danmarks Fiskeriforening er í øðini um avtaluna

Hetta er eitt stórt vónbrot, sigur Svend-Erik Andersen, formaður í Danmarks Fiskeriforening.

- Hetta er ófatiligt. Partarnir hava samráðast í fýra ár, og nú fáa Føroyar samsýning fyri sín ábyrgdarleysa fiskiskap seinastu árini. Henda avtalan gevur eisini donskum fiskimonnum verri kor næstu fimm árini, sigur Svend-Erik Andersen við fiskeritidende.dk.

Avtalan ber við sær, at danskir fiskimenn missa útivið 20 prosent av sínari kvotu, sum svarar til áleið 100 milliónir krónur í 2014. ES missir í alt kvotur fyri tvær milliardir krónur í hesum árinum.

- Danska fiskivinnan hevur verið merkt av, at samráðingarnar um Norðsjógvin og Skagerrak eru útsettar, tí strandarlondini hava ikki funnið semju um makrelin. Vit hava mist nógvar pengar síðan ársskiftið, og nú verður okkara partur somuleiðis minni. Hetta hava verið nakrir svartir mánaðir í danskari fiskivinnu, sigur Svend-Erik Andersen, formaður í Danmarks Fiskeriforening.

Danski fiskimálaráðharrin, Dan Jørgensen, vísir aftur kravinum frá Danmarks Fiskeriforening at rinda teimum endurgjald fyri mistar inntøkur.