Putin sissar umheimin: Vit taka bara Krim

Bert fáar tímar eftir at Vladimir Putin góðkendi eitt uppskot at innlima Krim-hálvoynna í Russland, fór russiski forsetin á røðarapallin í tinginum í Moskva við greiðum boðum til russar og allan umheimin: ”Søguligu bondini millum Russland og Krim-hálvoynna eru so sterk, at tað er sjálvsagt, at Krim verður innlimað í russisku tjóðina,” segði Vladimir Putin.

Virkandi stjórnin í Kiev hevur fordømt, at Russland hevur blandað seg í viðurskiftini á Krim-hálvoynni. Men Putin slær fast, at Russland fer at varðveita eitt tætt tilknýti og góð viðurskifti til Ukraina.

”Viðurskiftini við brøðrafólk okkara í Ukraina hava altíð verið, eru og fara altíð at vera avgerandi fyri okkum,” sigur Putin.

Russiska stjórnin viðurkennir ikki nýggju stjórnina í Kiev, og Putin stuðlar Viktor Janukovitj, sum varð feldur sum forseti í februar mánað.

”Trúgvi ikki teimum, sum royna ar ræða tykkum við Russlandi, og sum rópa hart upp um, at onnur landaøki koma eftir Krim-hálvoynna. Vit hava ongan tørv á nøkrum parti av Ukraina,” segði Vladimir Putin fyrr í dag.

Kelda: Information/ritzau