Lógin um rúsevni skal herðast munandi

<p>Bæði fútin og TAKS hava gjørt vart við, at hóskandi er at dagføra og herða reglurnar í donsku lógini um "euforiserende stoffer", sum er galdandi í Føroyum, so lógin í Føroyum verður samsvarandi lógini í Danmark.</p>

<p>Fútin vil hava, at til ber at revsa fólk, sum innflyta rúsevni, sum ikki eru nevnd í galdandi lóg. Fútin mælti eisini frá at seta donsku regluna um at revsa við ávaring í gildi í Føroyum. Tað hevur landsstýrismaðurin tikið til eftirtektar.</p>

<p><strong>Lógarbroyting neyðug</strong></p>

<p>Nógv rúsevni, sum ikki eru í galdandi lóg í Føroyum, eru komin seinastu árini. Bæði fútin og TAKS hava fortreð av teimum, tí illa ber til at steðga teimum í tollinum.</p>

<p>Lógin loyvir tí ikki. Í ávísum førum er eydnast at steðga innflutningi við at brúka apotekslógina. Men tann lógin hevur ongar revsimøguleikar. Tað er umráðandi at fáa lógarbroytingina setta í gildi í hesi tingsetuni, sigur landsstýrismaðurin.</p>

<p>Serliga nógv rúsevni koma til Føroya um summarið, tá festivalar og konsertir eru, siga tollararnir. Hvørki danska Forsætismálaráðið ella Løgmálaráðið hava nakra viðmerking um ríkislógartilmælið, sum er á veg í løgtingið.</p>