Barsilsskipanin: Kæra kemur øllum til góðar

Ein avgerð hjá Kærunevndini hjá Barsilsskipanini kemur nú øllum til góðar, sum eru í somu støðu sum pápin, sum í fjør kærdi Barsilsskipanina, tí hann helt seg hava fingið ov lítið í barsilspengum.

Tað hevur Kærunevndin fingið at vita frá Barsilsskipanini og Vinnumálaráðnum.

Fáa munin

Øll, sum hava fingið somu avgerð frá Barsilsskipanini eftir 2.desember í fjør, tá Kærunevndin tók sína avgerð, fáa munin millum tað, tey fingu í barsilspengum, og tað, tey eiga at fáa sambært Kærunevndini. Hini málini, sum eru eldri, skulu venda sær til Barsilsskipanina fyri at fáa eina nýggja avgerð.   

Kærunevndin hjá Barsilsskipanini hevur givið tveimum monnum viðhald, tí Kærunevndin sigur, at Barsilsskipanin tulkaði og umsat lógina um barsilsskipan skeivt. Tað gjørdi Barsilsskipanin, tá hon avgjørdi, hvussu nógvar barsilspengar, fólk fingu, tá tey fóru í barsilsfarloyvi í styttri tíð enn ein mánað. 

Tey fingu ov lítið, sigur Kærunevndin. Hon avgjørdi, at tveir pápar, sum kærdu avgerðir hjá Barsilsskipanini, skulu fáa nakrar túsund krónur afturat haðani.

Tingið broytt lógina

Nú hevur løgtingið broytt lógina eftir uppskoti frá Vinnumálaráðnum. Lógin er nú orðað soleiðis, at eingin ivi skal vera um, at tey, sum umsita hana, tulka og umsita hana rætt. Og lógin er broytt soleiðis, at hon nú svarar til tulkingina og umsitingina hjá Barsilsskipanini.

Og sambært Kærunevndini eiga tey pengar til góðar, sum fingu ov lítið frá Barsilsskipanini, tí skipanin, sambært Kærunevndini, umsat lógina skeivt.