Hava bert fingið triðingin av sjálvuppgávunum

Nú ein vika er eftir hjá partafeløgum at lata roknskap og sjálvuppgávuna inn, hevur TAKS bert fingið ein triðing av sjálvuppgávunum og roknskapunum, vísir ein uppgerð hjá stovninum.

Hetta er fyrsta árið, har tað við lóg er kravt, at sjálvuppgávur og roknskapir skulu latast inn talgild um Vinnugluggan hjá TAKS, og tí kki kunnu latast inn á pappíri longur. Somuleiðis skulu skjølini, sum Skráseting Føroya skal hava, nú eisini latast inn um Vinnugluggan.

Neyvari hagtøl

Við talgildu innlatingini av sjálvuppgávunum fær TAKS nógv neyvari hagtøl fyri innlatingina enn áður. Við nógv størri neyvleika sæst nú í skásetingarskipanini hjá TAKS, nær sjálvuppgávurnar verða latnar inn, og eisini hvussu nógvar eru latnar inn. 

Hetta er fyrsta árið, har alt kemur inn talgilt, og tí hevur TAKS ikki líknandi hagtøl frá undanfarnum árum at samanbera við. Tí er eisini trupult at siga, um tað er vanligt, at so nógv bíða til síðstu løtu.

Ikki órólig

- Av royndum vita vit, at rættiliga nógv verður latið inn beint upp undir innlatingarfreistina, og tí eru vit sum so ikki órólig. Munurin í ár er tó tann, at øll feløgini mugu hava atgongd til Vinnugluggan fyri at kunna lata inn. Um feløgini enn ikki hava fingið atgongd til Vinnugluggan, so kann vandi vera fyri, at tey ikki fáa latið sjálvuppgávuna inn til tíðina, og tað er óheppið, sigur Eyðun Mørkøre, stjóri, í tíðindaskrivi.

Tað er Taks, sum gevur feløgum atgongd til Vinnugluggan.