Tíggjutals milliónir oljutunnur

Faroe Petroleum fær meira olju í sín part, nú olja er funnin í einari síðusporsboring á Bue leitimiðinum í norskum øki.

Faroe Petroleum eigur 25 prosent av loyvinum. 

Samanumtikið eigur Faroe Petroleum nú millum 20 og 50 milliónir tunnur av olju á Bue og Pil miðunum. Ein tunna av olju er 159 litrar.

Bue og Pil

Bue síðusporsbrunnurin er góðar tveir kilometrar frá Pil fundinum. Hann varð boraður niður á 3.656 metrar. 

Kanningar benda á, at einki samband er millum Pil og Bue fundirnar. Bue verður tí mettur sum ein sjálvstøðugur fundur.

Fyristøðufelagið, VNG Norge, væntar at kunna fáa millum seks og 25 milliónir tunnur úr nýggja Bue fundinum. Faroe Petroleum eigur fjórðingin. 

Faroe Petroleum og hini feløgini, sum eiga loyvið, fyrireika nú leiti- og metingarætlanir fyri komandi ár fyri at vita, um meira fæst burtur úr loyvinum.