Ikki pláss fyri fleiri at fiska makrel

Útlendsk skip, sum ætlanin var at fáa til Føroya at fiska makrel og norðhavssild, fáa ikki loyvi frá Fiskimálaráðnum.

Ein bunki av brøvum, sum enda við orðunum "niðurstøðan er, at umsókn tykkara ikki verður gingin á møti," er farin úr Fiskimálaráðnum seinastu dagarnar:

Fyri at sleppa at fiska makrel og norðhavssild krevst veiðiloyvi. Uttan veiðiloyvi ber ikki til at fáa fiskiloyvi.

Og nýggj veiðiloyvi vera ikki latin.

Allar ætlanir um at fáa fleiri uppsjóvarskip í føroyska flotan eru kollsigldar í Fiskimálaráðnum.    

Ikki fleiri aktørar

Ætlanin er ikki at geva fleiri loyvi at fiska makrel og norðhavssild í ár.

Ætlanin er ikki, at fleiri aktørar skulu sleppa framat, sum Jacob Vestergaard, landsstýrismaður í fiskivinnumálum, tekur til. 

Ella tað gjørdi hann fyri einum góðum mánað síðani.

Men hann segði tað við tí fyrivarni, at kunngerðin um fiskiskapin í 2014 var ikki liðug tá. 

Nú er kunngerðin líðug, lýst og komin í gildi. 

Fáa ikki veiðiloyvi 

Og síðani hava "nýggir aktørar" fingið svar frá Fiskimálaráðnum. Umsókn teirra um at sleppa at fiska uppsjóvarfisk er ikki gingin á møti. Veiðiloyvi verður ikki latið. 

Útvarpið hevur fingið innlit í 20 umsóknir, sum fingu nei frá Fiskimálaráðnum.

Í nógvum førum er talan um at keypa skip úr øðrum londum at fiska av millum annað føroysku makrelkvotuni.