Álitið um fiskidagarnar kemur seinnapartin

Meirilutin í Vinnunevndini, teir tríggir fólkafloksmenninir og sambandsmaðurin, mælir løgtinginum til at taka undir við uppskotinum hjá Jacob Vestergaard, landsstýrismanni, um fiskidagarnar næsta fiskiár.

Vinnunevndin fór á fund klokkan tólv at viðgera og undirskriva álitið um fiskidagarnar.

Alfred Olsen, formaður í Vinnunevndini, sigur, at nevndarlimirnir hjá samgonguni eru samdir um at mæla tinginum til at taka undir við, at fiskidagtalið næsta ár verður tað sama sum í verandi fiskiári.

Ætlanin er at leggja álitið fram á tingfundinum klokkan tvey í dag. 

Onnur viðgerð verður mikudagin og triðja viðgerð fríggjadagin.