Landsjørð er dýrast í Havn

Ymiskt er, hvussu nógv jørð verður seld fyri í Føroyum. Tað veldst um, hvar í landinum, jørðin er.

Sambært yvirlitum hjá Búnaðarstovuni, sum verkætlanarbólkurin hjá Fiskimálaráðnum fekk, tá hann skrivaði frágreiðing um at einskilja landsjørðina í Føroyum, kostar ein gyllin av ognarjørð úr 6.000 kr. í Hesti upp í 117.000 kr. í Norðtoftum.

Miðalprísurin fyri 37 sølur í yvirlitinum er 33.000 krónur fyri eina gyllin.

Dýrast í Havn

Tá landsjørð verður seld til annað enn landbúnað er hon dýrast í Havn, upp í 137 krónur fyri fermeturin í veltum lendi, sum liggur væl fyri. Í útoyggj og millum bygdir kostar fermeturin av góðum lendi 34 krónur, tá jørðin verður seld til annað enn landbúnað.

Verkætlanarbólkurin sigur, at hugsanin er, at festijørðin verður seld fyri ein prís, sum kann ásetast við grundarlagi í skrásettu prísunum hjá Búnaðarstovuni.

Sambært einum øðrum yvirliti er landsjørðin býtt í 285 festi. Onnur landsjørð burturav er í 533 pørtum og harafturat 236 í blandi við ogn.