Noyðist helst at skriva út val

Aleqa Hammond hevur nýtt góðar 106.000 kr. til m.a. ferðir hjá familjuni, og hóast hon hevur goldið peningin aftur, so eru nógvar atfinningar ímóti henni.

Forkvinnan í IA, Sara Olsvog krevur at nýval verður útskrivað, tí landsins leiðari kann ikki nýta almennar pengar, uttan at tað fær fylgjur.

Andstøða og samgonga finnast at

Politiski framsøgumaðurin í hennara egna flokki, Siumut, Karl-Kristian Kruse, sigur tað vera burtur úr vón og viti, at politikarar nýta almennar pengar, og ikki rinda pengarnar aftur fyrr enn eitt ár seinni, ella eftir tað.

Hann krevur at slíkt ikki hendir aftur í grønlendskum politikki. Kristian Jeremiassen, sum er formaður í almennu grannskoðaranevndini, og sum eisini er limur í Siumut sigur, at málið um tær gott 100.000 kr. má fáa fylgjur.

Misálit í morgin

Grønlendska landstingið kemur saman í morgin, og tá verður helst atkvøtt um misálitisuppskot ímóti Alequ Hammond.

Verður uppskotið samtykt, verður Aleqa Hammond noydd til at útskriva val, siga eygleiðarar.

Attasut situr í samgongu við Siumut, og flokkurin hevur ikki enn tikð støðu til, hvussu hann fer at atkvøða.

Aleqa Hammond hevur verið landsstýrisforkvinna í Grønlandi síðani í apríl í fjør.