Posta vil sleppa undan bygdarnøvnunum í lógini

Posta vil sleppa at avgera, hvar økisposthúsini skulu vera, og ikki noyðast at hava tey har, sum lógin um P/f Postverk Føroya sigur, at tey eiga at vera.
Lógin sigur, at P/F Postverk Føroya er bundið til at hava økisposthús í Klaksvík, í Saltangará, á Oyrabakka, í Miðvági, í Tórshavn, í Skopun og á Tvøroyri til 31.desember 2015.

Men á nýggjárinum er ætlanin at broyta lógina, so har fer at standa, at økisposthús skulu vera í Norðoyggjum, Eysturoynni, Vágum, Streymoynni, Sandoynni og Suðuroynni.   

Flogvøllurin í staðin fyri Miðvág

Sambært P/f Postverki Føroya er tað óheppið og óneyðuga kostnaðarmikið, at býir og bygdir eru nevnd í lógini, tí tað kann vera høgligari og bíligari at hava posthúsið í grannabygdini. 

Í Vágum er betur egnað at hava økisposthús á flogvøllinum enn í Miðvági. Men galdandi lóg sigur, at økisposthúsið skal vera í Miðvági. 

Posta sigur, at tænastan er líka góð á flogvøllinum sum í Miðvági, men hon kostar minni á flogvøllinum.