Álop á franskt blað - 12 fólk dripin

<p>Atsóknin at franska satirublaðnum Charlie Hebdo í París hevur kravt í minsta lagi 12 mannalív, og 10 fólk eru særd. Fýra av teimum dripnu eru teknarar á blaðnum, og tvey eru løgreglufólk.</p>

<p>Eitt av starvsfólkunum á blaðnum Charlie Hebdo sigur, at gerningsmenninir skutu eftir øllum, sum rørdist í redaksjónshølinum, og 40 fólk flýddu upp á tekjuna.</p>

<p>Videomyndir vórðu tiknar av gerningsmonnunum, áðrenn teir sluppu til rýmingar í einum svørtum bili. Hann varð seinni funnin tómur í útriðuni av París.</p>

<p>Myndirnir vísa, at drápsmenninir hava Kalashnikov-byrsur. Eitt av starvsfólkunum læt menninar sleppa inn í bygningin, har Charlie Hebdo heldur til.</p>

<p><strong>Gera alt fyri at finna teir seku</strong></p>

<p>Teknarin Corine Rey hevði júst verið í barnagarðinum eftir dóttrini, tá hon trýst á loyniorðið, so teir sluppu inn á redaksjónina, og síðani fóru teir at skjóta.</p>

<p>Blaðið hevur millum annað&nbsp;prentað tiltiknu Muhammed-tekningarnar París er í hægstu tilbúgving, og 3.000 løgreglufólk hava fingið boð um at verja býin. Trygdin í eitt nú flutnings- og heilsuverkinum er herd, eins og KT-trygdin.</p>

<p>Ein onnur sjónbandaupptøka vísir, at tveir vápnaðir menn róptu "Allah Akbar" á arabiskum, sum kann týðast til "Guð er stórur." Franski forsetin, Francois Hollande, sigur, at talan er um eina yvirgangsatsókn, og at alt verður gjørt fyri at finna teir seku.</p>

<p>Stjórnin í Fraklandi fór á kreppufund seinnapartin í dag. Í kvøld fer franski forsetin, Francois Hollande, væntandi at halda røðu fyri tjóðini í kjalarvørrinum í álopinum á franska blaðið í morgun.</p>