Frakland syrgir: Jagstra framvegis brotsmenn

<p>Sjey fólk eru handtikin í Fraklandi í nátt, eftir yvirgangsálopið&nbsp;í París í gjár. Tað upplýsir franski forsætisráðharrin, Manuel Valls, í samrøðu við sjónvarpsstøðina RTL.</p>

<p>Tey sjey fólkini, ið eru handtikin í málinum, eru øll skyldfólk ella vinfólk hjá teimum, ið eru undir illgruna at hava staðið fyri yvirgangsatsóknini mikudagin, tá 12 fólk vórðu myrd.</p>

<p>Løgreglan leitar í løtuni eftir tveimum brøðrum, ið hildið verður, hava staðið fyri álopinum. Triði maðurin, illgruni er um, hevur givið seg yvir til løgregluna, sambært AFP.&nbsp;Hann er 18 ára gamal.</p>

<p><strong>Áður dømdur fyri yvirgang</strong></p>

<p>Í nátt hava servandar deildir hjá fronsku løgregluni leitað eftir monnunum í býnum Reims, 140 kilometrar í ein landnyrðing úr París.</p>

<p>Løgreglan hevur kunngjørt myndir av teimum báðum monnunum, sum eru 32 og 34 ára gamlir. Sambært tíðindastovuni AP eru menninir brøður og franskir ríkisborgarar.</p>

<p>Annar bróðirin, Cherif Koauchi, hevur áður sitið í fongsli fyri at hava útvegað ungar menn til heilagt kríggj í Irak. Hann varð dømdur í 2005 og varð fongslaður í hálvt annað ár.</p>

<p><strong>Syrgidagur lýstur í Fraklandi</strong></p>

<p>Menninir, sum løgreglan leitar eftir, trokaðu seg fyrrapartin í gjár inn á redaksjónina á satirublaðnum Charlie Hebdot og skutu frá hond. 10 starvsfólk á blaðnum, teirra millum blaðstjórin, doyðu, og tvey løgreglufólk lótu eisini lív.</p>

<p><strong>SÍ EISINI <a href="http://kvf.fo/greinar/2015/01/07/fleiri-folk-fronskum-bladi-dripin">Álop á franskt blað - 12 fólk dripin</a></strong></p>

<p>Menninir tóku til rýmingar í einum bili, sum seinni varð funnin tómur. Teir fóru eftir øllum at døma í annan bil, har løgreglan fann samleikakort hjá monnunum, og tí bar til at eyðmerkja teir.</p>

<p>Fleiri túsund løgreglufólk vórðu send at leita eftir yvirgangsmonnunum, og París er í hægstu tilbúgving. Franski forsetin, Francois Hollande, hevur kunngjørt, at almennur syrgidagur er í Fraklandi í dag.</p>

<p><strong>Fordøma yvirgangsálopið</strong></p>

<p>Leiðarar í øllum heiminum hava fordømt yvirgangsatsóknina í París í gjár, og Charlie Hebdo&nbsp;hevur fingið fleiri samkenslufjarrit, millum annað&nbsp;frá Føroyskum Miðlafólkum. Felagið sigur, at tað fordømir hesa ræðuligu gerð, sum er eitt álop á miðlafólk, ið bara eru farin til arbeiðis.</p>

<p>Men óttin, sum hetta álop kann elva til, er eisini eitt álop á talu- og skrivifrælsið hjá okkum øllum, skriva Føroysk Miðlafólk í samkenslufjarritinum til Charlie Hebdo.</p>

<p>Francois Hollande, franski forsetin, segði stutt eftir yvirgangsálopið mikudagin, at myndugleikarnir fara at gera alt, teir eru mentir, fyri at finna og handtaka brotsmenninar.</p>