Charlie Hebdo kemur út aftur mikudagin

Mikudagin vórðu leiðandi starvsfólkini á franska satiru-blaðnum Charlie Hebdo dripin í kaldum blóði, meðan tey sótu á redaktiónsfundi. Í dag byrjaði framleiðslan av einari nýggjari útgávu av blaðnum.

Starvsfólk, ið yvirlivdu yvirgangsatsóknina um middagsleiti mikudagin, eru farin til verka at framleiða tilfar til næstu útgávuna av Charlie Hebdo í hølunum hjá blaðnum Liberation í Paris.

Millum starvsfólkini vóru klummu-skrivarin Patrick Pelloux og advokaturin hjá Charlie Hebdo, Richard Malka. Hann segði við AFP í gjár, at ein serútgáva av teimum, ið yvirlivdu, kemur út mikudagin og prenta verða eina millión eintøk og ikki 60.000, sum er vanliga upplagið hjá blaðnum.

Hetta hendir samstundis sum servand fronsk løgreglulið royna at steðga tvey gíslarán, sum hava beinleiðis samband við yvirgangsatsóknina á Charlie Hebod.

Kouachi beiggjarnir hava girt seg inn í einari prentsmiðju í býnum Dammartin, og tvey fólk, ið stuðla Kouachi beiggjunum, hava tikið fimm fólk gíslar í einari jødiskari sølumiðstøð í Paris.