Samd um býtið av felagskvotu

<p>Fýra reiðarí vildu ikki vera við, so eginkvoturnar eru ikki stórar. Men úrtøkan verður størri, tá skipini kunnu fiska, tá best liggur fyri hjá teimum.</p>

<p>Fyri at sleppa undan kappfisking, sum gevur verri prís, og fyri at sleppa undan at fiska makrel í bestu upsatíð, hava lemmatrolarar og partrolarar gjørt semju um eginkvotur, hóast Fiskimálaráðið bara gav skipunum felagskvotu við hámarki.</p>

<p><strong>36 reiðarí&nbsp;við í semjuni</strong></p>

<p>Reiðarí, sum eiga 36 av 40 loyvum í trolarabólkinum, eru við í semjuni. Tey eru samd um, at eginkvotan hjá hvørjum skipi er 386 tons, hóast Fiskimálaráðið gav teimum 868,5 tons. Orsøkin er, at fýra skip eru ikki við semjuni.</p>

<p>Teirra 868,5 tons í part gera, at 3.474 tons ikki eru við í felagskvotuni, sum er býta millum tey 36 skipini, sum eru við í semjuni. Og tað gevur 386 tons til hvønn trolaran.</p>

<p>Semjan, sum bara er galdandi fyri 2015, ger, at flestu skipini bíða við at fara eftir makrelinum, tí nú er besta upsatíð. Sambært semjuni millum tey 20 reiðaríini gjørdi kappfiskiskapurin í fjør, at partrolararnir fingu í miðal hálva aðru krónu minni fyri kilo av makreli enn skip í øðrum bólkum fingu.</p>

<p><strong>Mistu 45 milliónir</strong></p>

<p>Trolarnir mistu 45 mió. kr., tá semja varð gjørd um at partrolarnir skuldu fáa hálva aðru krónu minni fyri hvørt kilo av makreli. Reiðaríini sendu 2. januar landsstýrismanninum í fiskivinnumálum eina áheitan um at geva skipunum eginkvotur.</p>

<p>Hin møguleikin er at seta hámarkið hjá hvørjum skipi so høgt, at tað eggjar øllum reiðaríunum í trolarabólkinum at gera semju, so øll skipini fáa sín part. Men tað vildi landsstýrismaðurin ikki.</p>

<p>Hóast reiðaríini, sum eiga tey 36 loyvini, hava lagt upp fyri, at hini fýra, sum ikki eru við, fáa meira í sín part, viðurkenna tey ikki, at teir, sum ikki eru við í semjuni, hava betri rætt til makrelkvotu enn hinir.</p>