Tryggingarfólk fingið boð um góðan skikk

Tryggingarfólk kunnu ikki siga við fólk, sum ætla at keypa eina trygging, at tey sleppa ikki út, fyrr enn tey hava gjørt avtalu um tryggingina.

Tað er ágangandi marknaðarføring, tá kundin verður villleiddur til at halda, at hann ikki kann fara úr hølunum, fyrr enn ein avtala er gjørd um tryggingina.

Ein kunngerð um góðan skikk fyri tryggingarfeløg, sum Vinnumálaráðið lýsti í farnu viku, er komin í gildi.

Saman við kunngerðini eru 14 dømi um villleiðandi marknaðarføring og fýra dømi um ágangandi marknaðarføring í privatum kundaviðurskiftum.

Dømi um villleiðandi marknaðarføring er, tá rættindi, sum kundin eigur sambært lógini, verða gjørd til sereyðkenni í tilboðnum hjá tryggingarfelagnum.

Meginreglan í nýggju kunngerðini er tann, at eitt tryggingarfelag skal vera reiðiligt og álítandi mótvegis sínum kundum.