Ókeypis orðabøkur væl móttiknar

Fyrstu vikuna, orðabøkurnar hjá Sprotanum vóru ókeypis at brúka, nýttu 14.568 fólk høvið, sigur Jonhard Mikkelsen, stjóri í Sprotanum, ið eigur og rekur orðabøkurnar, við kvf.fo.

Umleið 2.000 fólk leitaðu í orðabókunum hjá Sprotanum, áðrenn orðabøkurnar vóru ókeypis hjá fólki at brúka. Talið er tvífaldað, og nú brúka 4.000 fólk orðabøkurnar hvønn dag.

Greinin heldur fram niðanfyri

Danskt-føroyskt tann best umtókta

Tann nógv mest brúkta orðabókin, síðan tær vórðu ókeypis, er danskt-føroyskt. Síðan kemur føroyskt-føroyskt orðabókin, og henni á baki enskt-føroyskt. Síðan er eitt týðiligt glopp niður til hinar.

Meginparturin av fólkunum, ið leita í orðabókunum, búgva í Føroyum. 90 prosent av teimum, ið sláa orð upp í orðabókunum, búgva í Føroyum, sigur stjórin í Sprotanum.

Restin av fólkunum, ið brúka orðabøkurnar á sprotin.fo, búgva í øðrum londum, sum til dømis í Kolumbia, Avstralia, Fraklandi, Turkalandi og Kekkia.