Nú verður fimta PISA-kanningin

Um tvær vikur verður fimta PISA kanningin í føroyska fólkaskúlanum. PISA kanningin verður í 9.flokki dagarnar 16. til 19.mars.

Mentamálaráðið leggur stóran dent á málið í PISA kanningunum, skrivar Skúlablaðið. Mentamálaráðið ger nógv burturúr at orða uppgávurnar væl og greitt, sigur Claus Reistrup, ráðgevi í Mentamálaráðnum, við Skúlablaðið.

Uppgávurnar verða týddar úr enskum og partvís úr fronskum. 

- Vit seta stór krøv til týðararnar og brúka bara royndar, góðar týðarar, sigur Claus Reistrup við Skúlablaðið.

Kenna málburðin

Millum annað eru fólk, sum kenna málburðin hjá næmingunum í 9.flokki, biðin um at týða uppgávurnar.

PISA er ein altjóða kanning, sum mátar førleikar, sum serfrøðingar í OECD-londunum halda vera grundleggjandi og neyðugar hjá fólki at hava, so tey kunnu taka av avbjóðingunum í vitanarsamfelagnum, skrivar Skúlablaðið.

Í hvørjari PISA kanning verða trý faklig høvuðsøki kannað, lesing, støddfrøði og náttúrulærugreinir. Í ár verður høvuðsdenturin lagdur á náttúruvísindi. 

Í PISA 2015 verður ein nýggjur táttur, sum kallast at samstarva í felag um at loysa eina uppgávu. 

Hvør næmingur skal í einum virtuellum rúmi tjatta við ein “persón” í forritinum í geymanum. Hetta kenna næmingarnir longu frá ymiskum telduspølum, skrivar Skúlablaðið.