Gerðarrætturin avgera løn fyri sigling á páskum

Tað stendur til Fasta Gerðarrættin at gera av, hvørja samsýning starvsfólkini á Strandfaraskipum landsins skulu hava, tá siglt verður á páskum.

Ósemja tók seg upp millum Lønardeildina í Fíggjarmálaráðnum øðrumegin og Skipara- og Navigatørfelagið, Maskinmeistarafelagið og Starvsmannafelagið hinumegin stutt fyri jól, eftir at Strandferðslan hevði givið manningunum boð um, at strandfaraskipini skulu sigla allar dagar á jólum. 

Dupulta samsýning

Feløgini kravdu 100 prosent samsýning, men tað vildi lønardeildin ikki, og tískil góvu feløgini forboð fyri at arbeiða jóladag.

Málið varð beint í Gerðarrættin, sum gjørdi av, at arbeiði ikki kundi niðurleggjast. Men avgerðin segði einki um, hvørja samsýning starvsfólkini skulu hava. 

Feløgini tvíhalda um rættin til dupulta samsýning, og tey hava gjørt av at beina málið í Gerðarrættin, sigur Annfinn Garðalíð, formaður í Skipara- og Navigatørfelagnum.

Hann vónar, at ein avgerð verður tikin fyri páskir, tá strandfaraskipini eisini fara at sigla hvønn dag.