Bakkafrost 647 milliónir krónur í avlopi

293 milliónir kr. verða latnar í vinningsbýti, og metti skatturin av vinningsbýtinum verður millum 80 og 90 milliónir kr.

Rúni M. Hansen, nevndarformaður í Bakkafrosti, segði í frágreiðingini til aðalfundin í dag, at alivinnan er bundin av góðum og støðugum reglugerðum frá myndugleikunum.

- Tað er alneyðugt at hava gjøgnumskygdar langtíðarkarmar fyri at kunna taka langtíðaravgerðir og reka vinnuna á skilabesta hátt. Kappingarførið er tengt at førleikanum hjá myndugleikanum at skapa vinnuni gott umhvørvi, tí alivinnan er í altjóa kapping, segði Rúni M. Hansen.

Síðani 2011 hevur alivinnan rindað hálvt triðja prosent í loyvisskatti, men í fjør varð skatturin umskipaður til varandi loyvisskatt, sum er hálvt fimta prosent umframt eitt hálvt prosent av umsetninginum av alingini.

Bakkafrost hækkaði fimm ára íløguætlanina í fjør við 470 milliónum krónum, upp í hálva aðru milliard kr. Sáttmálar eru gjørdir við bæði føroyskar og útlendskar veitarar. 

Umleið 1.000 fólk starvast í Bakkafrosti, og felagið rindaði 264 milliónir kr. í lønum í fjør.

Nevndin hevur avgjørt at lata starvsfólkunum ein eyka ágóða í partabrøvum, sum svarar til tvey prosent av forvunnu inntøkuni í fjør.

Á aðalfundinum í dag stóðu Annika Frederiksberg og Øystein Sandvik fyri vali, og bæði vórðu afturvald. Rúni M. Hansen heldur fram sum nevndarformaður