Atlantsflog fær helst sínar tyrlur frá landinum

Atlantic Airways minti í síðstu viku landsstýrið á, at málið um nýggjan sáttmála millum partarnar um tyrluflúgving hevur skund, tí Atlantic Airways skal skriva undir sáttmálan um tvær nýggjar tyrlur í seinasta lagi fríggjadagin.

Annars verða tyrlurnar báðar næstan tíggju milliónir krónur dýrari at keypa.

Er sáttmálin um tvær nýggjar Augusta tyrlur ikki undirskrivaður 15. mai, fer hvør tyrla at kosta 650-túsund evrur meira, so báðar tyrlurnar kosta góðar 9,7 mió. kr. meira, skrivar Atlantic Airways í telduposti til landsstyrið.

Pengarnir úr landskassanum, 444 mió. kr. næstu tíggju árini, eru avgerandi fyri, um Atlantic Airways kann keypa nýggjar tyrlur.

Upprunaliga tíðarfreistin at skriva undir var 15.apríl, men Augusta góðtók at leingja freistina til hálvan mai. 

Nýggju tyrlurnar koma næsta ár.     

Løgtingið skal atkvøða um uppskotið hjá landsstýrismanninum í fiskivinnumálum um nýggjan sáttmála millum landsstýrið og Atlantic Airways í dag.

Samd Vinnunevnd mælir løgtinginum til at samtykkja uppskotið.