Føroyar sleppa ikki við til Eurovision

Bjørn Kalsø, landsstýrismaður, hevur svarað Janusi Rein, løgtingsmanni, sum spurdi, um Føroyar kunnu vera við í stóru árligu evropeisku tónleikakappingini.

Landsstýrismaðurin svarar, at Mentamálaráðið og Kringvarpið kannaðu fyri nøkrum árum síðani, um Føroyar kunnu vera við.

Møguleikarnir kannaðir í 2010

Kringvarpið spurdi í 2010 um virknan limaskap í evropeiska public-service felagsskapinum European Broadcasting Union (EBU), sum krevst fyri at vera við í Eurovision Song Contest.

Svarið var, at bara sjálvstøðug lond kunnu fáa limaskap. Bjørn Kalsø heldur tó, at til ber at sleppa av við hesa treytina, um nóg stór orka verður løgd í tað, møguliga saman við øðrum londum, sum stuðla Føroyum. Men tá krevst, at Kringvarpið av nýggjum søkir um virknan limaskap í EBU, sigur landsstýrismaðurin.

Janus Rein spurdi Johan Dahl, landsstýrismann, hvussu nógvar krónur, Føroyar høvdu fingið burturúr teirri marknaðarføring, sum tað er at vera við í Eurovision Song Contest. Johan Dahl hevur ikki svarað enn.