- Tíðindi, mentan og ítróttur
Makrelbýtið: Kielsen vísir atfinningum aftur
![](https://kvf.fo/sites/default/files/styles/grein-ovasta-mynd/public/kim1.jpg?itok=MIWS5JPl)
Í Grønlandi vísir landsstýrisformaðurin Kim Kielsen øllum atfinningum aftur, nú fiskivinnunevndin í Landstinginum hevur funnist at grønlendska makrelbýtinum.
Hann skrivar í lesarabrævi, at grønlendska landsstýrið skilir ikki tær ábreiðslur, sum hava verið.
Meirilutin í fiskivinnunevndini í grønlendska landstinginum heldur, at landsstýrismaðurin í fiskivinnumálum hevur dugað ov illa at grundgivið fyri býtinum. Fleiri reiðarí, sum fingu kvotu í 2014, fingu ikki kvotu í 2015.
Ikki ført fyri at svara
- Landsstýrið er ikki ført fyri at svara, hví júst hasi reiðaríini hava fingið makrelkvotur í ár. Tað eru ikki bara vit, sum vilja vita tað, men alt samfelagið sum heild, nú virði fyri fleiri milliónir verða útlutað, skrivar meirilutin í fiskivinnunevndini í sínum áliti.
Tey heita samstundis á grønlendska landsstýrið um at koma fram við øllum upplýsingum, sum hava týdning fyri málið.
Men Kim Kielsen sigur seg ikki skilja atfinningarnar. Landsstýrið hevur mett um allar umsókirnar, og tey reiðaríini, sum ikki fingu makrelkvotu í ár, vita eisini, hví tey ikki sluppu upp í part, skrivar landsstýrisformaðurin.
Tað er greitt, at eingin broyting verður í kvotabýtinum í ár, tí annars er vandi fyri, at reiðaríini, sum hava fingið kvotu, fara at reisa endurgjaldskrav.