Lestraríbúðir í Kommunuskúlanum

Kommunuskúlin í Havn skal nú umbyggjast til lestraríbúðir.

Bústaðir hava søkt um at sleppa at leiga ein part av Kommunuskúlanum í 30 ár, og í gjárkvøldið samtykti býráðið at leiga Bústøðum 1440 fermetrar. Talan er um lonina, sum vendir móti Sjúrðargøtu og Tróndargøtu.

Bústaðir rinda umbyggingina og umvælingina til lestraríbúðir.  

TAKS hevur gjørt vart við, at skulu Bústaðir sleppa undan meirvirðisgjaldinum av umvælingini, noyðast Bústaðir at eiga og ikki leiga, tí TAKS krevur tinglýst veð í bygninginum fyri MVG-frítøkuna. 

Vilja sleppa undan mvg

Bústaðir kanna, um til ber at sleppa undan hesi reglu. Men fæst undantak ikki, biðja Bústaðir um at sleppa at keypa partin av Kommunuskúlanum fyri eina krónu. Tá fær kommunan forkeypsrætt fyri ein frammanundan mettan prís. 

Talan verður um 30 ára leigumál, sum kann leingjast tíggju ár. 

Tá leigumálið við Bústaðir gongur út, hevur kommunan rætt til at yvirtaka innrættaðu hølini fyri 75 prosent av mettum virði. Leigan verður 1.000 kr. um árið. 

Býráðið atkvøddi í gjárkvøldið fyrst um eitt uppskot hjá Jógvani Arge um at taka Kommunuskúlan niður og tingast við Bústaðir um at byggja lestraríbúðir á staðnum. Tað uppskotið fall.