Minna á fráboðanarskylduna

Riðluskriði varð fyrstu ferð staðfestur í Føroyum í 1984. Ridluskriði er síðani funnin í Skælingi, á Glyvursnesi, í Havn og í Fugloynni.

Hálvan juni boðaði Starvsstovan frá, at ridluskriði nú eisini er staðfestur í hagapartinum Skálafjall, ytripartur, á Skála.

Ringa seyðasjúkan er nú í trimum oyggjum í Føroyum. Í hagapørtum, har ridluskriði er staðfestur, skulu seyðaeigarar síggja til, at seyðurin ikki kemur í samband við annan seyð.

Bjóða sær til at kanna seyð

Heilsufrøðiliga starvsstovan bjóðar sær til at ílegukanna seyð fyri at vita, um seyðurin er mótstøðuførur og, hvørjar ílegur, seyðurin ber víðari.

Ílegukanningin sigur tó ikki, um seyðurin hevur ridluskriða, men um hann er í vanda fyri at verða smittaður. Ein ílegukanning kostar 530 krónur fyri hvønn seyð.

Ikki ber til at gera slíkar ílegukanningar av geitum, skrivar Heilsufrøðiliga starvsstovan á heimasíðu sínari.