Sea Shepherd-kvinna avhoyrd í rættinum

40 ára gamla amerikanska kvinnan, sum politiið tók mánamorgunin í Kalsoyarfirði, noktaði seg seka, tá hon varð avhoyrd í Føroya rætti í dag.

Hon varð sjálv onnur tikin í RIB-bátinum Farley hjá Sea Shepherd í Kalsoyarfirði mánamorgunin. Hon varð avhoyrd í dag, tí hon skal av landinum fyrsta dagin. 

Sambært ákæruvaldinum hevur kvinnan brotið grindlógina, tí tey vóru nærri grindarakstri enn ein fjórðing, og tí tey ikki gjørdu eftir boðunum frá sýslumanninum.

Løgreglan hevur bátin

Føroya rættur avgjørdi, at politiið kann hava bátin og tað, sum var í honum, tá hann varð tikin, tí málið móti teimum báðum Sea Shepherd fólkunum verður dómsviðgjørt. Ikki er greitt enn, nær tað verður.

Kvinnan segði, at hon er í Føroyum sum ferðafólk. Men ákærin vísti henni manningarlistan hjá Sam Simon, har sum navn hennara stendur. 

Hon segði annars, at hon virkar sum sjálvboðin fyri Sea Shepherd. Endamálið er at skjalprógva grindadráp.

Mintist einki

Hon segði seg annars ikki minnast nógv av tí, sum hendi í Kalsoyarfirði fyri fýra døgum síðani. Summum spurningum vildi hon ikki svara og í onkrum førum segði hon seg ikki vita.     

Upplýst var í rættinum í dag, at politiið ætlaði at avhoyra skiparan á Sam Simon í morgin, tí hann er undir illgruna fyri at hava brotið grindalógina. Men Sam Simon er farin til Hetlands.