Nú verður samgonguskjalið undirskrivað

Klokkan fýra í dag verður samgonguskjalið hjá Javnaðarflokkinum, Tjóðveldi og Framsókn undirskrivað. Samgonguskjalið verður undirskrivað í løgtinginum.

Teir tríggir flokkarnir eru eftir samráðingar í slakar tvær vikur vorðnir samdir um, hvussu teir ætla sær at stýra Føroyum næstu fýra árini.

Flokkarnir samdir um býtið á málsøkjum

Flokkarnir eru eisini vorðnir samdir um, hvussu málsøkini í landsstýrinum skulu býtast millum flokkarnar.

Fyrstu dagarnar var Nýtt sjálvstýri eisini við í samgongusamráðingunum, men fór burturúr.

Tað gjørdi flokkurin, tí hann kundi ikki taka undir við ætlaða fiskivinnupolitikkinum, og flokkurin vildi hava fólkaatkvøðu um hjúnabandslógina.

Poul Michelsen setur tingfundin

Fyrsti tingfundurin eftir løgtingsvalið verður í morgin klokkan tíggju. Fyrst skulu valbrøvini hjá teimum valdu og valúrslitið 1. september góðkennast. Tingið velur fimm løgtingsfólk at kanna valbrøvini.

Síðani setur Poul Michelsen, sum er elsti valdi tinglimurin - hann fylti 71 í summar - tingfundin. Síðani er á dagsskránni váttan eftir grein átta í stýrisskipanarlógini.

Greinin sigur, at tá góðkent er, at løgtingsfólk er valt, skal tað leggja frá sær øll álitisstørv í nevndum, ráðum og øðrum, sum eru undir eftirliti landsstýrisins ella, sum landsstýrið hevur skipað tað í, tó undantikin beinleiðis fólkavald umboð.

Landsstýrisfólkini sett seinnapartin

Síðani velur løgtingið formansskapin, formann og tríggjar næstformenn. Tað fyrsta, sum nýggi løgtingsformaðurin væntandi fer at gera, verður at skjóta upp, at Aksel V. Johannesen, formaður Javnaðarfloksins, verður valdur til løgmann.

Tingið velur ikki landsstýrisfólkini. Løgmaður tilnevnir landsstýrisfólk. Sum skilst verður samkoma í Tingnesi seinnapartin, har sum løgmansskiftið verður og nýggju landsstýrisfólkini fáa síni setanarskriv.

Tingfundurin verður í morgin klokkan tíggju, tí stýriskipanarlógin sigur, at nývalda løgtingið kemur saman til fundar klokkan 10:00 tólvta yrkadag eftir valdagin.

Kringvarpið sendir beinleiðis, tá samgonguskjalið verður undirskrivað - bæði í útvarpinum og sjónvarpinum. Sendingarnar hoyrast og síggjast eisini á kvf.fo