Tilflytarar í Klaksvík sleppa fram at býráðnum

Integrasjónsnevndin í Klaksvík er nú mannað. 

Í nevndini eru Jógvan Skorheim, borgarstjóri, Gunvá við Keldu, býráðslimur, Kinga Eysturland, Jean Gudjonsson,  Rainer Latupeirissa, Sadiqull Patawary og Catherine Steinberg.

Klaksvíkar býráð hevur samtykt ein integratiónspolitikk. Og sambært honum skal veljast ein integrasjónsnevnd.

At integrera fólk er at fáa útlendingar at gerast partur av tí samfelag, tey eru flutt í.

Fimm fundir um árið

Ætlanin er, at integratiónsnevndin í Klaksvík skal hava fimm fundir um árið

Uppgávan hjá nevndini verður at leggja fram dagføringar, avbjóðingar og onnur viðkomandi viðurskifti á regluligum fundum við umboð fyri kommununa.

Og endamálið við nevndini er at geva tilflytarum eitt hóskandi umboð og ein formligan møguleika at samskifta trygt við kommununa, samstundis sum kommunan javnan fær dagførda vitan um økið.

Í fyrsta umfari verður talan um royndartíð í eitt ár, frá 1.oktober í ár.