Flóttafólk druknað út fyri turkisku strondini

Turkiska sjóverjan tók líkini av fólkunum upp. Roknað verður við, at báturin hevði kós móti onkrum av grisku oynnum.

Tey 17 fólkini - fimm kvinnur, fimm børn og sjey menn - druknaðu, tí tey sluppu ikki út úr stongdu kahyttini á bátinum. Sambært altjóða tíðindastovunum vóru øll ættað úr Sýria. 20 onnur, sum vóru á dekkinum á bátinum, bjargaðu lívinum við at leypa í havið og svimja innaftur móti turkisku strondini. Sambært tíðindastovunum vóru tey øll í bjargingarvestum.

Mett verður, at okkurt um 300.000 fólk, flóttafólk og migrantar, hava tikið túrin úr Turkalandi til Grikkalands higartil í ár. Samstundis sum flóttafólkastreymurin úr Sýria heldur fram, so royna framvegis nógv flóttafólk úr Norðurafrika at vinna vegin tvørtur um Miðjarahavið til Evropa. Roknað verður við, at okkurt um ein hálv millión fólk eru komin til Evropa í ár, nógv teirra umvegis vandamiklu leiðina tvørtur um Miðjarahavið í lítlum, vánaligum bátum.

Fleiri enn 2800 fólk hava latið lív ella eru ikki komin afturíaftur á leiðini tvørtur um Miðjarahavið.