ES og Turkaland samd um virkisætlan

ES-londini komu eitt stórt stig víðari í arbeiðinum fyri flóttafólk á toppfundinum sum var í Bruxelles í gjár, og ikki endaði fyrr enn í nátt

Ríkisleiðararnir í ES samdust í nátt um at veita Turkalandi 22,3 milliardir kr. í hjálp, so landið kann hjálpa flóttafólkunum, samstundis sum eftirlitið á markinum skal herðast

Mynd: Savnsmynd/AP

Sigmar Bláberg

Bjarni Mohr

16.10.2015 - 09:08

Ríkisleiðararnir samdust um at veita Turkalandi 22,3 milliardir kr. í hjálp, so landið kann hjálpa flóttafólkunum, samstundis sum eftirlitið á markinum skal herðast.

Týski samveldiskanslarin, Angela Merkel, segði, at Turkaland higartil hevur nýtt yvir 52 milliardir kr. til tey nógvu flóttafólkini í landinum, og tí er tað ikki meir enn rímiligt, at ES-londini stuðla Turkalandi, helst við eini líknandi upphædd.

SÍ EISINI Býtislykil fyri flóttafólk skal nú roynast í verki

Semjan sum ES hevur gjørt við Turkaland, fer væntandi at hava við sær, at streymurin av flóttafólkum sum vilja sleppa til ES-londini, fer at linka, tí flóttafólkini skulu fáa hjálp í Turkalandi, Libanon og Jordan ístaðin.

Danski forsætisráðharrin, Lars Løkke rasmussen, segði eftir fundin, at ES-londini nú av álvara tosa um, hvat er neyðugt at gera, fyri at hjálpa flóttafólkunum, heldur enn at btosa um, hvussu londini kunnu taka sær av einum brotparti av flóttafólkunum.