Enn ongin nevndarviðgerð

Løgtingið er í løtuni í heystfrí, og enn er eingin tingfundur ásettur. Í aðru viku verður fundur í Norðurlandaráðnum, og tá verður heldur eingin tingfundur.

Fíggjarnevndin hevur ongan fund havt um fíggjarlógaruppskotið hjá Kristinu Háfoss, landsstýriskvinnu, enn, men ætlanin er at hava fund í nevndini, tá tingfundur verður aftur, upplýsir Ruth Vang, forkvinna í fíggjarnevndini.

Ruth Vang sigur, á fyrsta fundinum um fíggjarlógaruppskotið verður Kristina Háfoss biðin um greiða frá, hvørja tíðarætlan landsstýrið hevur, tí í fíggjarlógaruppskotinum eru bert framskrivað tøl. Tí verður eingin verulig viðgerð fyrr enn í fíggjarnevndini og tá uppskotið kemur til 2. viðgerð í tinginum.

Fíggjarlógin skal samtykkjast og avgreiðast fyri nýggjár. 

Fíggjarnevndin hevur skipað seg við Ruth Vang í Framsókn sum forkvinnu og Bárði á Steig Nielsen í Sambandsflokkinum sum næstformanni.