45 milliónir í skuld strikaðar

Nú gongur eisini betur hjá línuflotanum. Í fjør batnaði raksturin hjá teimum stóru línuskipunum so nógv, at hann samanumtikið gav avlop, í miðal 403.000 krónur hjá hvørjum skipi.

Tað vísir ein greining, sum grannskoðaravirkið Numo hevur gjørt. Línuflotin hevði hall øll árini frá 2010 til 2013. Úrslitið í fjør batnaði, serliga tí fíggjarinntøkurnar hjá ávísum skipum vuksu, og haraftrat hækkaði fiskaprísurin.

Størri fíggjarinntøkur stava frá, at okkurt skip hevur fingið skuld strikaða. Í fjør vóru 14 línuskip størri enn 110 tons í Føroyum. Í miðal fiskaðu tey 902 tons og seldu fyri slakar 12,2 mió. kr.

Miðalprísurin var 13,47 krónur fyri kilo. Í 2013 fingu skipini í miðal 2,33 krónur minni fyri kilo. Línuskipini vóru í miðal 222 dagar á fiskileið í fjør.