Tekniskir trupulleikar á Smyrli

Smyril hevur havt tekniskar trupulleikar í dag, og tí hava túrar verið avlýstir seinnapartin.

Staðfest varð, at ein leki var í toppstykkinum á tí eina motorinum, og skiparin gjørdi av, at toppstykkið skal skiftast, áðrenn siglt verður aftur.

Smyril hevur fýra motorar, men í hesum veðrinum er ikki ráðiligt at sigla við trimum motorum, verður sagt av Strandferðsluni.

Fara vesturum

Fráferðin úr Havn klokkan fýra seinnapartin varð tí avlýst og eisini túrurin av Krambatanga klokkan 19.30.

Siglt verður av Havnini klokkan 21.15, men Strandferðslan boðar frá, at siglingartíðin verður longd einar 30-45 minuttir, tí Smyril siglir vesturum.

Eisini er fráferðin úr Havn í morgin broytt frá klokkan 11 til klokkan 12.