Fýrverk órógvar midnáttargudstænastur

- Runt um í landinum ljóða harðir brestir og hvøll skot í grannalagnum hjá kirkjuni. Tað er næstan ikki inniverandi, skrivar Jógvan Fríðriksson, biskupur, á heimasíðu fólkakirkjunnar.

Vanligt var at hava gudstænasta klokkan trý korter til midnátt nýggjársaftanskvøld. Men nútíðar nýggjárshald órógvar so illa, at hetta ber illa til longur, sigur biskupur.

Hava endurskoðað støðuna

- Ja, enntá í dómkirkjuni fyri fáum árum síðani stukku vit leys úr stólinum, so álvarsliga var nýggja árið fagnað á tignarligum og søguríkum staði, skrivar Jógvan Fríðriksson, biskupur.

Kirkjuráð og prestar hava endurskoðað og mett um støðuna. Skilagóðar niðurstøður eru funnar, skrivar biskupur. Nógvar kirkjusóknir hava valt at flyta gudstænastuna nakrar tímar til tess at minka um darvandi árinini, sum hvøllir brestir hava á gudstænastuna.

Gudstænastan, sum plagdi at verða send beinleiðis í Kringvarpinum nýggjársnátt, er nú tikin upp eina ferð í adventini.