Eingin fráboðan um mat og drekka á flogrutunum

Eingin fráboðan er komin frá Atlantic Airways um matin umborð á flogførunum, sum so nógv hevur verið kjakast um seinastu tíðina.

Tað sigur Niels Mortensen, nevndarformaður í Atlantsflogi við in.fo. Hann vil kortini ikki avsanna tíðindini um, at matur og drekka ikki verður ókeypis umborð á flogførunum hjá Atlantsflog eftir 1. mai.

Hann vil heldur ikki svara, um broytingar, sum eru gjørdar í felagnum, síðani leiðslan varð broytt fyri góðum tveimum árum síðani, fara at síggjast aftur í úrslitinum fyri 2015. Ársroknskapurin er ikki klárur enn. 

- Vit mugu sjálvandi fyrst boða eigarunum frá úrslitinum, áðrenn tað fer út í fjølmiðlarnar, sigur hann við in.fo.

Fleiri broytingar á veg

Men Niels Mortensen vísir á, at Atlantic Airways er eitt stórt felag við dýrum tólum. 

- Felagið umsetir fyri hálva milliard krónur um árið. Vit kunnu staðfesta, at ferðafólkatalið veksur, at prísirnir eru lækkaðir, og at fólk brúka tilboðini, sum felagið er komið við, sigur Niels Mortensen við in.fo. 

Niels Mortensen ger púra greitt, at uppgávan hjá honum var at fáa tað at verða so bíligt sum gjørligt at ferðast. Hann sigur við in.fo, at felagið arbeiðir við fleiri broytingum, sum vit fara at hoyra um í næstum. 

Ein av broytingunum er so eftir øllum at døma, at fólk í framtíðini sjálv skulu gjalda fyri matin umborð. Men sum skilst er hetta ikki einasta broytingin, sum verður hjá Atlantsflog í næstum.