Fleiri bústaðir til fólk við serligum tørvi

Serliga ring er støðan í Suðurstreymi. Vantandi viðlíkahald og vantandi neyðugar dagføringar hava gjørt, at 22 av 45 bústøðum í Havn kunnu ikki metast at vera hóskandi til endamálið, sigur landsstýriskvinnan.

Tað almenna fer at byggja bústaðir fyri slakar 60 mió. kr. Pengar eru játtaðir í ár, næsta ár og í 2018. Bústaðir hava avgjørt, at fimta hvør íbúð hjá teimum er ætlað fólkum við serligum tørvi.

Eirargarður má kannast nærri

Harafturat hava Bústaðir avgjørt at byggja 12 íbúðir til fólk við menningartarni og 12 íbúðir til fólk við sálarsjúku í Havn.

Alla tíðina hevur ætlanin verið, at partur av almennu játtanini skuldi brúkast til at nútímansgera bygningarnar á Eirargarði. Men nú er soppur staðfestur har.

Tí er ein umfatandi kanning neyðug, áðrenn nakað verður gjørt við Eirargarð, sigur Eyðgunn Samuelsen. Eyðgunn Samuelsen tekur í egnan barm.

Trupult at fáa Løgtingið at játta pening

Eyðgunn Samuelsen sigur, at stóri syndarin er politiska skipanin. Tað tykist vera ómetaliga trupult at fáa Løgtingið at játta nóg mikið av peningi til at viðlíkahalda almennar bygningar.

- Vit politikarar vilja helst klippa snórar og seta spakar í, meðan myndir verða tiknar. Tað selur, sigur landsstýriskvinnan.

Fjølmiðlarnir fáa eisini sítt. Teir varpa, sambært Eyðgunn Samuelsen, ikki á sama hátt ljós á viðlíkahaldskontuna hjá Landsverki. Í øllum førum ikki, fyrr enn ov seint er.