Skúlin letur kanska uppaftur

Klaksvíkar kommuna fer í kvøld at viðgera spurningin um skúlin í Svínoy skal lata uppaftur. Orsøkin er, at ein familja ætlar at flyta til Svínoyar, og í familjuni eru trý børn í skúlaaldri.

Sambært skránni til býráðsfundin, hava hesi vent sær til kommununa fyri at hoyra, hvussu tey skipa skúlagongdina hjá børnunum. Klaksvíkar kommuna hevur so vent sær til Mentamálaráðið fyri at fáa ráðgeving í hesum málinum.

Ábøtur mugu gerast fyrst

Sambært málsfrágreiðingini hjá kommununi er skúlin í slíkum standi, at ábøtur mugu gerast, áðrenn skúlin kann takast í nýtslu aftur.

Trivnaðarnevndin mælir til, at gera neyðugu ábøturnar og lata skúlan uppaftur. Mentamálaráðið vil fyrst hava, at Klaksvíkar kommuna tekur endaliga avgerð og sendir ráðnum eina umsókn, áðrenn ráðið tekur støðu til spurninin.

Tað var ein partur av avtaluni um kommunusamanlegging, at Svínoyar skúli varð varðveittur.